मार्केटयार्ड येथील शारदा गणपती मंडळ येथील बेकायदेशीर पत्र्याचे शेड तात्काळ हटवा : अमर पंडागळे

पुणे शहर प्रतिनिधी : पुणे येथील मार्केटयार्ड परिसरातील श्री छत्रपती शिवाजी महाराज मार्केटयार्ड गणेशोत्सव मंडळ (शारदा गणपती) येथे गणेशोत्सव काळामध्ये बेकायदेशीर पत्रा शेड बांधकाम केलेले आहे.सदर बांधकाम पत्रा शेड कोणतीही अधिकृत परवानगी न घेता सार्वजनिक जागेत बेकायदेशीरपणे उभारले आहे.कृषी उत्पन्न बाजार समितीचे संचालक असलेले गणेश घुले हे श्री छत्रपती शिवाजी महाराज मार्केटयार्ड गणेशोत्सव मंडळाचे संस्थापक अध्यक्ष असून त्यांनी त्यांच्या पदाचा गैरवापर करून पत्र्याच्या शेडचे बांधकाम केलं असल्याची नागरिकांमध्ये जोरदार चर्चा आहे

या शेडमुळे शेतकरी, ग्राहक व हमाल यांच्या दैनंदिन शेतीमाल वाहतूक, माल उतरवणे-भरणे या कामांमध्ये मोठा अडथळा निर्माण होत आहे. शेडमुळे वाहनांची वर्दळ थांबून शेतकऱ्यांचा शेतमाल खराब होत आहे, हमाल वर्गाला काम करण्यास जागा उपलब्ध होत नाही. ग्राहक व व्यापाऱ्यांना ये-जा करण्यास त्रास होत आहे.सदर कृती ही महाराष्ट्र कृषी उत्पन्न पणन अधिनियम १९६३ चे कलम ५२ चे उल्लंघन असून, तात्काळ हा बेकायदेशीर पत्रा शेड हटवण्यात यावा व संबंधितांवर कायदेशीर कारवाई करावी व चौकशीचा अहवाल मला कळवावा अशी मागणी कामगार न्याय सुरक्षा वृत्तपत्राचे संपादक अमर पंडागळे यांनी खालील नमूद ठिकाणी निवेदनाद्वारे केली आहे.

1) कार्यकारी संचालक/सरव्यवस्थापक,महाराष्ट्र राज्य कृषि पणन मंडळ,बाजार समिती,पुणे

2) सचिव, कृषी उत्पन्न बाजार समिती,पुणे 

3) हमाल पंचायत / माथाडी बोर्ड ऑफिस, मार्केट यार्ड, पुणे